ਪੰਚਕੂਲਾ, 23 ਅਪ੍ਰੈਲ,ਬੋਲੇ ਪੰਜਾਬ ਬਿਊਰੋ :
ਰੂਸ ‘ਚ ਵਰਕ ਪਰਮਿਟ ਦਿਵਾਉਣ ਦੇ ਨਾਂ ‘ਤੇ 18 ਲੱਖ ਰੁਪਏ ਦੀ ਠੱਗੀ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਨੀਰਜ ਕੁਮਾਰ ਵਾਸੀ ਬਰਵਾਲਾ ਦੀ ਸ਼ਿਕਾਇਤ ’ਤੇ ਚੰਡੀਮੰਦਰ ਪੁਲੀਸ ਨੇ ਕੇਸ ਦਰਜ ਕਰ ਲਿਆ ਹੈ। ਨੀਰਜ ਨੇ ਪੁਲਸ ਨੂੰ ਦੱਸਿਆ ਕਿ ਮੋਹਾਲੀ ਦੇ ਰਹਿਣ ਵਾਲੇ ਬਬਲੂ ਅਤੇ ਡੇਰਾਬੱਸੀ ਦੇ ਰਹਿਣ ਵਾਲੇ ਮਹਿੰਦਰ ਨੇ ਰੂਸ ‘ਚ ਨੌਕਰੀ ਦਿਵਾਉਣ ਦੇ ਨਾਂ ‘ਤੇ 18 ਲੱਖ ਰੁਪਏ ਲਏ। ਨੀਰਜ, ਨਿਸ਼ਾਂਤ ਰਾਣਾ, ਮਨਦੀਪ ਅਤੇ ਅਭੈ ਪ੍ਰਤਾਪ ਨੂੰ ਵਿਦੇਸ਼ ਭੇਜਣ ਲਈ ਮਹਿੰਦਰ ਨੇ ਰੂਸ ਭੇਜਣ ਲਈ ਪ੍ਰਤੀ ਨੌਜਵਾਨ 5 ਲੱਖ ਰੁਪਏ ਦੀ ਮੰਗ ਕੀਤੀ ਸੀ। ਉਸ ਦੀਆਂ ਗੱਲਾਂ ’ਤੇ ਯਕੀਨ ਕਰ ਕੇ ਚਾਰਾਂ ਨੇ ਉਸ ਨੂੰ 18 ਲੱਖ ਰੁਪਏ ਐਡਵਾਂਸ ਦੇ ਦਿੱਤੇ।
ਮਾਰਚ 2024 ਵਿੱਚ ਉਹ ਪਾਸਪੋਰਟ ਅਤੇ ਸਾਰੇ ਦਸਤਾਵੇਜ਼ਾਂ ਨਾਲ ਰਾਮਪੁਰ ਪਿੰਡ ਵਿੱਚ ਮਹਿੰਦਰ ਸਿੰਘ ਨੂੰ ਮਿਲਿਆ। ਇਸ ਤੋਂ ਬਾਅਦ ਮਹਿੰਦਰ ਨੇ ਕਿਹਾ ਕਿ ਉਹ ਉਸ ਨੂੰ ਰੂਸ ਵਿਚ ਵਰਕ ਪਰਮਿਟ ਦਿਵਾ ਕੇ ਉੱਥੇ ਭੇਜ ਦੇਵੇਗਾ। 15 ਤੋਂ 20 ਦਿਨਾਂ ਵਿੱਚ ਵੀਜ਼ੇ ਦਾ ਇੰਤਜ਼ਾਮ ਹੋ ਜਾਵੇਗਾ, ਇਹ ਕਹਿ ਕੇ ਉਹ ਸਾਰੇ ਦਸਤਾਵੇਜ਼ ਅਤੇ ਪੈਸੇ ਲੈ ਗਿਆ। ਇਸ ਤੋਂ ਬਾਅਦ ਰੂਸ ਪਹੁੰਚ ਕੇ ਉਸ ਨੂੰ ਬਾਕੀ ਦੋ ਲੱਖ ਰੁਪਏ ਦੇਣ ਲਈ ਕਿਹਾ ਗਿਆ। ਉਸ ਨੂੰ ਟੂਰਿਸਟ ਵੀਜ਼ੇ ‘ਤੇ ਰੂਸ ਭੇਜਿਆ ਅਤੇ ਉੱਥੇ ਪਹੁੰਚ ਕੇ 10 ਦਿਨਾਂ ਤੱਕ ਕੋਈ ਕੰਮ ਨਹੀਂ ਮਿਲਿਆ। ਇਸ ਤੋਂ ਬਾਅਦ ਜਦੋਂ ਉਹ ਉੱਥੇ ਕੰਮ ਲਈ ਗਿਆ ਤਾਂ ਪੁਲਿਸ ਨੇ ਉਸ ਨੂੰ ਫੜ ਲਿਆ। ਇਸ ਤੋਂ ਬਾਅਦ ਪੁਲਿਸ ਨੇ ਦੱਸਿਆ ਕਿ ਉਸ ਨੂੰ 10 ਦਿਨਾਂ ਦੇ ਟੂਰਿਸਟ ਵੀਜ਼ੇ ‘ਤੇ ਭੇਜਿਆ ਗਿਆ ਹੈ। ਹੁਣ ਉਹ ਇਸ ਵੀਜ਼ੇ ਨਾਲ ਇੱਥੇ ਨਹੀਂ ਰਹਿ ਸਕਦਾ। ਪੁਲਿਸ ਨੇ ਉਸਨੂੰ ਭਾਰਤ ਜਾਣ ਲਈ ਕਿਹਾ ਅਤੇ ਜੇਕਰ ਉਹ ਨਾ ਗਿਆ ਤਾਂ ਉਸਨੂੰ ਜੇਲ੍ਹ ਭੇਜ ਦਿੱਤਾ ਜਾਵੇਗਾ। ਇਸ ਤੋਂ ਬਾਅਦ ਜਦੋਂ ਉਸ ਨੇ ਭਾਰਤ ਵਾਪਸ ਆ ਕੇ ਪੈਸੇ ਮੰਗੇ ਤਾਂ ਉਹ ਕੁੱਟਮਾਰ ਕਰਨ ਦੀਆਂ ਧਮਕੀਆਂ ਦੇ ਕੇ ਟਾਲ-ਮਟੋਲ ਕਰਦਾ ਰਿਹਾ। ਜਦੋਂ ਕਈ ਮਹੀਨਿਆਂ ਬਾਅਦ ਪੈਸੇ ਵਾਪਸ ਨਹੀਂ ਕੀਤੇ ਗਏ ਤਾਂ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਗਈ।
