ਸਮਾਣਾ, 7 ਜੂਨ,ਬੋਲੇ ਪੰਜਾਬ ਬਿਊਰੋ;
ਸਮਾਣਾ ’ਚ ਹੋਏ ਦਰਦਨਾਕ ਹਾਦਸੇ, ਜਿਸ ’ਚ 7 ਬੱਚਿਆਂ ਦੀ ਜਾਨ ਗਈ ਸੀ, ਦੇ ਮਾਮਲੇ ’ਚ ਇਨਸਾਫ਼ ਦੀ ਮੰਗ ਕਰਦੇ ਹੋਏ ਮ੍ਰਿਤਕ ਬੱਚਿਆਂ ਦੇ ਪਰਿਵਾਰ ਲਗਾਤਾਰ ਰੋਸ ਪ੍ਰਗਟ ਕਰ ਰਹੇ ਹਨ। ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦਿਆਂ ਪਟਿਆਲਾ ਦੀ ਡਿਪਟੀ ਕਮਿਸ਼ਨਰ ਪ੍ਰੀਤੀ ਯਾਦਵ ਇਨ੍ਹਾਂ ਪਰਿਵਾਰਾਂ ਨਾਲ ਮੁਲਾਕਾਤ ਕਰਨ ਸਮਾਣਾ ਪਹੁੰਚੀ।
ਜਦੋਂ ਡੀਸੀ ਮੌਕੇ ’ਤੇ ਪਹੁੰਚੀ ਤਾਂ ਪੀੜਤ ਪਰਿਵਾਰਾਂ ਨੇ ਉਨ੍ਹਾਂ ਦੀ ਆਰਤੀ ਉਤਾਰੀ, ਪਰ ਇਸ ਦੇ ਪਿੱਛੇ ਭਾਵਨਾਵਾਂ ਵਿੱਚ ਗੁੱਸਾ ਅਤੇ ਨਿਰਾਸ਼ਾ ਛੁਪੀ ਹੋਈ ਸੀ। ਉਨ੍ਹਾਂ ਨੇ ਕਿਹਾ, “ਤੁਸੀਂ ਆਏ ਹੋ, ਪਰ ਸਾਡਾ ਇਨਸਾਫ਼ ਅਜੇ ਤੱਕ ਕਿਥੇ ਹੈ? ਤੁਸੀਂ ਕਰ ਕੀ ਰਹੇ ਹੋ?” ਪੀੜਤ ਮਾਪਿਆਂ ਨੇ ਸਵਾਲ ਕੀਤਾ ਕਿ ਅਖੀਰਕਾਰ ਇਕ ਮਹੀਨੇ ਬਾਅਦ ਹੀ ਸਰਕਾਰ ਜਾਗੀ ਕਿਉਂ?
ਪ੍ਰੀਤੀ ਯਾਦਵ ਨੇ ਪਰਿਵਾਰਾਂ ਨੂੰ ਭਰੋਸਾ ਦਿਵਾਉਂਦੇ ਹੋਏ ਕਿਹਾ ਕਿ ਜਿੰਮੇਵਾਰਾਂ ਨੂੰ ਜਲਦੀ ਕਾਨੂੰਨੀ ਦਾਇਰੇ ਹੇਠ ਲਿਆਉਣ ਦੀ ਕੋਸ਼ਿਸ਼ ਚੱਲ ਰਹੀ ਹੈ। ਉਥੇ ਮੌਜੂਦ ਭਾਰੀ ਪੁਲਿਸ ਬਲ ਨੇ ਸੁਰੱਖਿਆ ਪ੍ਰਬੰਧ ਕੱਸ ਕੇ ਰੱਖੇ ਹੋਏ ਸਨ। ਹਾਲਾਂਕਿ ਧਰਨਾ ਸ਼ਾਂਤੀਪੂਰਨ ਰਿਹਾ, ਪਰ ਮਾਪਿਆਂ ਦੀ ਗਿਣਤੀ ਕਾਫ਼ੀ ਜ਼ਿਆਦਾ ਸੀ।
ਮਾਪਿਆਂ ਨੇ ਹੱਥਾਂ ’ਚ ਬੈਨਰ ਅਤੇ ਪੋਸਟਰ ਫੜਕੇ ਆਪਣੀ ਪੀੜ੍ਹਾ ਅਤੇ ਇਨਸਾਫ ਦੀ ਮੰਗ ਦਾ ਇਜ਼ਹਾਰ ਕੀਤਾ। ਉਨ੍ਹਾਂ ਦੀ ਸਿਰਫ਼ ਇਕ ਹੀ ਮੰਗ ਹੈ—ਜਲਦੀ ਤੋਂ ਜਲਦੀ ਮੁੱਖ ਦੋਸ਼ੀ ਨੂੰ ਗ੍ਰਿਫ਼ਤਾਰ ਕਰਕੇ ਸਜ਼ਾ ਦਿੱਤੀ ਜਾਵੇ।
ਯਾਦ ਰਹੇ ਕਿ ਇਹ ਮਾਮਲਾ ਸਮਾਣਾ ਵਿੱਚ ਪਿੱਛਲੇ ਮਹੀਨੇ ਵਾਪਰਿਆ ਸੀ, ਜਿਸ ’ਚ 7 ਬੇਗੁਨਾਹ ਬੱਚਿਆਂ ਦੀ ਮੌਤ ਹੋ ਗਈ ਸੀ। ਅਜੇ ਤੱਕ ਮੁੱਖ ਦੋਸ਼ੀ ਪੁਲਿਸ ਦੀ ਪਕੜ ਤੋਂ ਬਾਹਰ ਹੈ, ਜਿਸ ਕਾਰਨ ਪਰਿਵਾਰਾਂ ਦੀ ਨਾਰਾਜ਼ਗੀ ਵਧ ਰਹੀ ਹੈ।
