ਉੱਤਰਕਾਸ਼ੀ, 24 ਜੂਨ,ਬੋਲੇ ਪੰਜਾਬ ਬਿਊਰੋ;
ਉਤਰਾਖੰਡ ਦੇ ਉੱਤਰਕਾਸ਼ੀ ਜ਼ਿਲ੍ਹੇ ਵਿੱਚ ਸੋਮਵਾਰ ਦੀ ਸ਼ਾਮ ਯਮੁਨੋਤਰੀ ਧਾਮ ਦੀ ਪੈਦਲ ਯਾਤਰਾ ਰਸਤੇ ’ਤੇ ਜਾਨਕੀ ਚੱਟੀ ਨੇੜੇ ਵੱਡਾ ਹਾਦਸਾ ਵਾਪਰ ਗਿਆ। ਮਲਬਾ ਡਿੱਗਣ ਨਾਲ ਇੱਕ ਪਿਤਾ ਅਤੇ ਉਸ ਦੀ ਬੇਟੀ ਦੀ ਮੌਤ ਹੋ ਗਈ, ਜਦਕਿ ਦੋ ਹੋਰ ਯਾਤਰੀ ਅਜੇ ਵੀ ਲਾਪਤਾ ਹਨ। ਹਾਦਸਾ ਓਸ ਵੇਲੇ ਵਾਪਰਿਆ ਜਦੋਂ ਪੰਜ ਯਾਤਰੀ ਰਸਤੇ ’ਚ ਪਹਾੜੀ ਖਿਸਕਣ ਦੀ ਚਪੇਟ ’ਚ ਆ ਗਏ।
ਮਾਰੇ ਗਏ ਦੋਵੇਂ ਯਾਤਰੀ ਉੱਤਰ ਪ੍ਰਦੇਸ਼ ਦੇ ਜੌਨਪੁਰ ਦੇ ਰਹਿਣ ਵਾਲੇ ਸਨ। ਪੁਲਿਸ ਵੱਲੋਂ ਦੇਰ ਰਾਤ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਸੂਚਨਾ ਦਿੱਤੀ ਗਈ। ਹਾਲਾਂਕਿ, ਇੱਕ ਔਰਤ ਨੂੰ ਬਚਾ ਲਿਆ ਗਿਆ ਹੈ ਤੇ ਉਸਨੂੰ ਤੁਰੰਤ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ।
ਐਸਡੀਆਰਐਫ਼ (SDRF), ਐਨਡੀਆਰਐਫ਼ (NDRF) ਅਤੇ ਜੰਗਲਾਤ ਵਿਭਾਗ ਦੀਆਂ ਟੀਮਾਂ ਨੇ ਅੱਜ ਸਵੇਰੇ ਤੋਂ ਫੇਰ ਰਾਹਤ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ ਹਨ। ਟੀਮਾਂ ਰੱਸੀ ਦੀ ਮਦਦ ਨਾਲ ਥੱਲੇ ਖੱਡ ’ਚ ਉਤਰ ਕੇ ਲਾਪਤਾ ਲੋਕਾਂ ਦੀ ਭਾਲ ਕਰ ਰਹੀਆਂ ਹਨ। ਭਾਰੀ ਮੀਂਹ ਅਤੇ ਮੌਸਮੀ ਖਰਾਬੀ ਕਾਰਨ, ਬਚਾਅ ਕੰਮਾਂ ਵਿੱਚ ਕਾਫ਼ੀ ਮੁਸ਼ਕਲ ਆ ਰਹੀ ਹੈ।
ਜਿਲ੍ਹਾ ਆਫ਼ਤ ਪ੍ਰਬੰਧਨ ਅਧਿਕਾਰੀਆਂ ਦੇ ਅਨੁਸਾਰ, ਲਾਪਤਾ ਹੋਣ ਵਾਲਿਆਂ ਵਿੱਚ ਇੱਕ 11 ਸਾਲ ਦੀ ਕੁੜੀ ਹੈ ਜੋ ਦਿੱਲੀ ਦੀ ਰਹਿਣ ਵਾਲੀ ਹੈ ਅਤੇ ਦੂਜਾ 35 ਸਾਲ ਦਾ ਨੌਜਵਾਨ ਜੋ ਮੁੰਬਈ ਨਾਲ ਸੰਬੰਧਤ ਹੈ।
