ਨਵੀਂ ਦਿੱਲੀ, 15 ਅਗਸਤ,ਬੋਲੇ ਪੰਜਾਬ ਬਿਊਰੋ;
ਭਾਰਤ ਅੱਜ 79ਵਾਂ ਆਜ਼ਾਦੀ ਦਿਵਸ ਮਨਾ ਰਿਹਾ ਹੈ ਅਤੇ ਇਸ ਖਾਸ ਮੌਕੇ ‘ਤੇ ਸਰਕਾਰ ਨੇ ਹਾਈਵੇ ਯਾਤਰੀਆਂ ਲਈ ਇੱਕ ਨਵੀਂ ਸਹੂਲਤ ਸ਼ੁਰੂ ਕੀਤੀ ਹੈ। ਹੁਣ ਰਾਸ਼ਟਰੀ ਰਾਜਮਾਰਗਾਂ ਅਤੇ ਐਕਸਪ੍ਰੈਸਵੇਅ ‘ਤੇ ਯਾਤਰਾ ਲਈ FASTag ਸਾਲਾਨਾ ਪਾਸ ਉਪਲਬਧ ਹੈ। ਇਸ ਪਾਸ ਦੀ ਕੀਮਤ 3,000 ਰੁਪਏ ਹੈ ਅਤੇ ਇਹ ਇੱਕ ਸਾਲ ਲਈ ਜਾਂ ਵੱਧ ਤੋਂ ਵੱਧ 200 ਯਾਤਰਾਵਾਂ ਲਈ ਵੈਧ ਰਹੇਗਾ।
ਇਸ ਪਾਸ ਨਾਲ ਯਾਤਰੀਆਂ ਨੂੰ ਚੁਣੀਆਂ ਗਈਆਂ ਸੜਕਾਂ ‘ਤੇ ਸਾਲ ਭਰ ਟੋਲ-ਮੁਕਤ ਯਾਤਰਾ ਦਾ ਲਾਭ ਮਿਲੇਗਾ। ਆਮ ਤੌਰ ‘ਤੇ FASTag ਨਾਲ ਹਰ ਵਾਰ ਟੋਲ ਪਾਰ ਕਰਨ ‘ਤੇ ਪੈਸੇ ਕੱਟੇ ਜਾਂਦੇ ਹਨ, ਪਰ ਇਸ ਪਾਸ ਦੇ ਨਾਲ ਇੱਕ ਵਾਰ ਭੁਗਤਾਨ ਕਰਕੇ 200 ਵਾਰ ਟੋਲ ਗੇਟ ਪਾਰ ਕੀਤਾ ਜਾ ਸਕਦਾ ਹੈ। ਇਸ ਤਰ੍ਹਾਂ ਇੱਕ ਟ੍ਰਿਪ ਦੀ ਲਾਗਤ ਲਗਭਗ 15 ਰੁਪਏ ਬਨਦੀ ਹੈ।
ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਨੇ ਦੱਸਿਆ ਕਿ ਆਮ ਤੌਰ ‘ਤੇ ਇਹਨਾਂ ਯਾਤਰਾਵਾਂ ਲਈ 10,000 ਰੁਪਏ ਤੱਕ ਖਰਚ ਹੁੰਦਾ ਸੀ, ਜੋ ਹੁਣ ਸਿਰਫ 3,000 ਰੁਪਏ ਵਿੱਚ ਸੰਭਵ ਹੋਵੇਗਾ। ਇਸ ਨਾਲ ਟੋਲ ਪਲਾਜ਼ਾ ‘ਤੇ ਲੰਬੀਆਂ ਕਤਾਰਾਂ ਘਟਣਗੀਆਂ ਅਤੇ ਰੀਚਾਰਜ ਦਾ ਝੰਜਟ ਵੀ ਨਹੀਂ ਰਹੇਗਾ।
ਮੁੱਖ ਨੁਕਤੇ:
• ਪਾਸ ਸਿਰਫ਼ ਨਿੱਜੀ ਕਾਰ, ਜੀਪ ਜਾਂ ਵੈਨ ਵਾਲਿਆਂ ਲਈ ਹੈ; ਟੈਕਸੀ, ਬੱਸ ਜਾਂ ਟਰੱਕ ਲਈ ਨਹੀਂ।
• ਇਹ ਸਿਰਫ਼ ਰਾਸ਼ਟਰੀ ਰਾਜਮਾਰਗ (NH) ਅਤੇ ਐਕਸਪ੍ਰੈਸਵੇ (NE) ‘ਤੇ ਹੀ ਵਰਤਿਆ ਜਾ ਸਕੇਗਾ, ਰਾਜ ਮਾਰਗਾਂ ਜਾਂ ਸਥਾਨਕ ਸੜਕਾਂ ‘ਤੇ ਨਹੀਂ।
• ਪਾਸ ਸਿਰਫ਼ NHAI ਦੀ ਅਧਿਕਾਰਤ ਵੈੱਬਸਾਈਟ ਜਾਂ ਹਾਈਵੇ ਯਾਤਰਾ ਐਪ ਰਾਹੀਂ ਹੀ ਖਰੀਦਿਆ ਤੇ ਐਕਟੀਵੇਟ ਕੀਤਾ ਜਾ ਸਕਦਾ ਹੈ।
• ਮੌਜੂਦਾ FASTag ‘ਤੇ ਹੀ ਪਾਸ ਐਕਟੀਵੇਟ ਹੋਵੇਗਾ, ਨਵਾਂ ਟੈਗ ਲੈਣ ਦੀ ਲੋੜ ਨਹੀਂ।
• ਪਾਸ ਟ੍ਰਾਂਸਫਰ ਨਹੀਂ ਕੀਤਾ ਜਾ ਸਕਦਾ; ਇਹ ਸਿਰਫ਼ ਉਸੇ ਵਾਹਨ ਲਈ ਵੈਧ ਹੋਵੇਗਾ ਜਿਸ ‘ਤੇ ਇਹ ਰਜਿਸਟਰ ਹੈ।
• ਸਿਰਫ਼ ਰਜਿਸਟ੍ਰੇਸ਼ਨ ਨੰਬਰ ਵਾਲੇ FASTag ‘ਤੇ ਹੀ ਇਹ ਮਿਲੇਗਾ; ਚੈਸੀ ਨੰਬਰ ਵਾਲੇ ਟੈਗ ‘ਤੇ ਨਹੀਂ।
• ਇੱਕ ਪਾਸੜ ਨੂੰ ਇੱਕ ਟ੍ਰਿਪ ਮੰਨਿਆ ਜਾਵੇਗਾ, ਆਉਣ-ਜਾਣ ਦੋ ਟ੍ਰਿਪ ਹੋਣਗੇ।
ਖਰੀਦਣ ਤੋਂ ਬਾਅਦ, ਐਕਟੀਵੇਸ਼ਨ ਦੀ ਪੁਸ਼ਟੀ SMS ਅਤੇ ਐਪ ਨੋਟੀਫਿਕੇਸ਼ਨ ਰਾਹੀਂ ਮਿਲੇਗੀ। ਇਹ ਸੇਵਾ ਪੂਰੀ ਤਰ੍ਹਾਂ ਵਿਕਲਪਿਕ ਹੈ ਅਤੇ ਸਿਰਫ਼ ਉਹ ਲੋਕ ਇਸਦਾ ਲਾਭ ਲੈ ਸਕਦੇ ਹਨ ਜੋ ਰਾਸ਼ਟਰੀ ਰਾਜਮਾਰਗਾਂ ‘ਤੇ ਅਕਸਰ ਯਾਤਰਾ ਕਰਦੇ ਹਨ।
