ਵਾਸ਼ਿਗਟਨ 21 ਫਰਵਰੀ ,ਬੋਲੇ ਪੰਜਾਬ ਬਿਊਰੋ;
ਸੁਪਰੀਮ ਕੋਰਟ ਨੇ ਅੱਜ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਵਿਆਪਕ ਆਲਮੀ ਟੈਰਿਫ ਨੂੰ ਰੱਦ ਕਰ ਦਿੱਤਾ, ਜਿਸ ਨਾਲ ਉਨ੍ਹਾਂ ਦੀਆਂ ਆਰਥਿਕ ਯੋਜਨਾਵਾਂ ਨਾਲ ਜੁੜੇ ਅਹਿਮ ਮੁੱਦੇ ’ਤੇ ਉਨ੍ਹਾਂ ਨੂੰ ਕਰਾਰੀ ਹਾਰ ਮਿਲੀ ਹੈ। 6-3 ਦੇ ਬਹੁਮਤ ਨਾਲ ਸੁਣਾਏ ਇਸ ਫ਼ੈਸਲੇ ਦਾ ਮੁੱਖ ਕੇਂਦਰ ਉਹ ਟੈਰਿਫ ਹਨ, ਜੋ ਐਮਰਜੈਂਸੀ ਸ਼ਕਤੀਆਂ ਦੇ ਕਾਨੂੰਨ ਤਹਿਤ ਲਗਾਏ ਗਏ ਸਨ, ਜਿਨ੍ਹਾਂ ਵਿੱਚ ਤਕਰੀਬਨ ਹਰ ਦੂਜੇ ਦੇਸ਼ ’ਤੇ ਲਗਾਏ ਗਏ ਵਿਆਪਕ ‘ਜਵਾਬੀ’ ਟੈਰਿਫ ਵੀ ਸ਼ਾਮਲ ਹਨ। ਦੂਜੇ ਪਾਸੇ ਟਰੰਪ ਨੇ ਫ਼ੈਸਲੇ ਨੂੰ ਦੇਸ਼ ਲਈ ਵੱਡਾ ਆਰਥਿਕ ਝਟਕਾ ਦੱਸਿਆ ਹੈ।
ਟਰੰਪ ਦੇ ਵਿਆਪਕ ਏਜੰਡੇ ਦਾ ਇਹ ਪਹਿਲਾ ਵੱਡਾ ਹਿੱਸਾ ਹੈ, ਜੋ ਦੇਸ਼ ਦੀ ਸਰਵਉੱਚ ਅਦਾਲਤ ਸਾਹਮਣੇ ਸਿੱਧੇ ਤੌਰ ’ਤੇ ਆਇਆ ਹੈ। ਉਨ੍ਹਾਂ ਆਪਣੇ ਪਹਿਲੇ ਕਾਰਜਕਾਲ ਦੌਰਾਨ ਤਿੰਨ ਕੰਜ਼ਰਵੇਟਿਵ (ਰੂੜੀਵਾਦੀ) ਜੱਜਾਂ ਦੀ ਨਿਯੁਕਤੀ ਕਰਕੇ ਇਸ ਅਦਾਲਤ ਦੇ ਸਰੂਪ ਨੂੰ ਘੜਨ ਵਿੱਚ ਮਦਦ ਕੀਤੀ ਸੀ। ਬਹੁਮਤ ਵਾਲੇ ਜੱਜਾਂ ਨੇ ਪਾਇਆ ਕਿ ਸੰਵਿਧਾਨ ‘ਬਹੁਤ ਸਪੱਸ਼ਟ ਤੌਰ ’ਤੇ’ ਕਾਂਗਰਸ (ਅਮਰੀਕੀ ਸੰਸਦ) ਨੂੰ ਟੈਕਸ ਲਗਾਉਣ ਦੀ ਸ਼ਕਤੀ ਦਿੰਦਾ ਹੈ, ਜਿਸ ਵਿੱਚ ਟੈਰਿਫ ਵੀ ਸ਼ਾਮਲ ਹਨ। ਚੀਫ ਜਸਟਿਸ ਜੌਨ ਰੌਬਰਟਸ ਨੇ ਲਿਖਿਆ, ‘‘ਸੰਵਿਧਾਨ ਨਿਰਮਾਤਾਵਾਂ ਨੇ ਟੈਕਸ ਲਗਾਉਣ ਦੀ ਸ਼ਕਤੀ ਦਾ ਕੋਈ ਵੀ ਹਿੱਸਾ ਕਾਰਜਪਾਲਿਕਾ ਨੂੰ ਨਹੀਂ ਸੌਂਪਿਆ ਸੀ।’’ ਜਸਟਿਸ ਸੈਮੂਅਲ ਅਲੀਟੋ, ਕਲੇਰੈਂਸ ਥੌਮਸ ਅਤੇ ਬ੍ਰੈਟ ਕਵਾਨੌ ਨੇ ਇਸ ਫ਼ੈਸਲੇ ਨਾਲ ਅਸਹਿਮਤੀ ਜਤਾਈ ਹੈ।
ਜਸਟਿਸ ਕਵਾਨੌ ਨੇ ਆਪਣੀ ਅਸਹਿਮਤੀ ਵਿੱਚ ਲਿਖਿਆ, ‘‘ਇੱਥੇ ਜਿਨ੍ਹਾਂ ਟੈਰਿਫਾਂ ਦਾ ਮੁੱਦਾ ਹੈ, ਉਹ ਸਿਆਸੀ ਤੌਰ ’ਤੇ ਸਹੀ ਜਾਂ ਗਲਤ ਹੋ ਸਕਦੇ ਹਨ ਪਰ ਜਿੱਥੋਂ ਤੱਕ ਕਾਨੂੰਨੀ ਇਬਾਰਤ, ਇਤਿਹਾਸ ਅਤੇ ਪੁਰਾਣੀਆਂ ਮਿਸਾਲਾਂ ਦਾ ਸਬੰਧ ਹੈ, ਉਹ ਸਪੱਸ਼ਟ ਤੌਰ ’ਤੇ ਕਾਨੂੰਨੀ ਹਨ।’’ ਟੈਰਿਫਾਂ ਬਾਰੇ ਇਹ ਫ਼ੈਸਲਾ ਟਰੰਪ ਨੂੰ ਹੋਰਨਾਂ ਕਾਨੂੰਨਾਂ ਤਹਿਤ ਡਿਊਟੀਆਂ ਲਗਾਉਣ ਤੋਂ ਨਹੀਂ ਰੋਕਦਾ। ਦੂਜੇ ਪਾਸੇ ਰਿਪਬਲਿਕਨ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਇਸ ਨੂੰ ਅਮਰੀਕੀ ਇਤਿਹਾਸ ਦੇ ਸਭ ਤੋਂ ਅਹਿਮ ਕੇਸਾਂ ਵਿੱਚੋਂ ਇੱਕ ਦੱਸਿਆ ਹੈ ਅਤੇ ਕਿਹਾ ਹੈ ਕਿ ਉਨ੍ਹਾਂ ਖ਼ਿਲਾਫ਼ ਆਇਆ ਫ਼ੈਸਲਾ ਦੇਸ਼ ਲਈ ਵੱਡਾ ਆਰਥਿਕ ਝਟਕਾ ਸਾਬਤ ਹੋਵੇਗਾ।
ਇਸ ਕਾਨੂੰਨੀ ਵਿਰੋਧ ਵਿੱਚ ਪੂਰੇ ਸਿਆਸੀ ਖੇਤਰ ਦੇ ਲੋਕ ਸ਼ਾਮਲ ਸਨ, ਜਿਨ੍ਹਾਂ ਵਿੱਚ ਲਿਬਰਟੇਰੀਅਨ ਅਤੇ ਵਪਾਰ-ਪੱਖੀ ਸਮੂਹ ਵੀ ਸ਼ਾਮਲ ਸਨ, ਜੋ ਆਮ ਤੌਰ ’ਤੇ ਰਿਪਬਲਿਕਨ ਪਾਰਟੀ ਦੇ ਨਾਲ ਖੜ੍ਹੇ ਹੁੰਦੇ ਹਨ। ਜਨਤਕ ਰਾਏ ਵਿੱਚ ਇਹ ਪਾਇਆ ਗਿਆ ਹੈ ਕਿ ਟੈਰਿਫ ਆਮ ਜਨਤਾ ਵਿੱਚ ਬਹੁਤੇ ਹਰਮਨਪਿਆਰੇ ਨਹੀਂ ਹਨ, ਕਿਉਂਕਿ ਵੋਟਰਾਂ ਵਿੱਚ ਮਹਿੰਗਾਈ ਤੇ ਵਸਤਾਂ ਦੀ ਪਹੁੰਚ ਨੂੰ ਲੈ ਕੇ ਵੱਡੀ ਚਿੰਤਾ ਪਾਈ ਜਾ ਰਹੀ ਹੈ।
ਜਸਟਿਸ ਬ੍ਰੈਟ ਕੈਵਾਨੌ ਨੇ ਆਪਣੇ ਅਸਹਿਮਤੀ ਵਾਲੇ ਫੈਸਲੇ ਵਿੱਚ ਰੂਸ ਤੋਂ ਤੇਲ ਖਰੀਦਣ ਦੇ ਮਾਮਲੇ ’ਤੇ ਭਾਰਤ ਦਾ ਵਿਸ਼ੇਸ਼ ਜ਼ਿਕਰ ਕੀਤਾ। ਕੈਵਾਨੌ ਨੇ ਕਿਹਾ, ਵਿਦੇਸ਼ੀ ਦਰਾਮਦ ’ਤੇ ਟੈਕਸ ਦੀ ਤਰ੍ਹਾਂ ਹੀ, ਇਸ ਮਾਮਲੇ ਵਿੱਚ ਵਿਚਾਰ ਅਧੀਨ ਆਈ ਈ ਈ ਪੀ ਏ ਟੈਰਿਫ ਵੀ ਵਿਦੇਸ਼ੀ ਮਾਮਲਿਆਂ ਨਾਲ ਸਬੰਧਤ ਹਨ। ਸਰਕਾਰ ਅਨੁਸਾਰ ਰਾਸ਼ਟਰਪਤੀ ਨੇ ਚੀਨ, ਬਰਤਾਨੀਆ ਅਤੇ ਜਾਪਾਨ ਸਮੇਤ ਹੋਰ ਪ੍ਰਮੁੱਖ ਵਪਾਰਕ ਭਾਈਵਾਲਾਂ ਨਾਲ ਵਪਾਰਕ ਸਮਝੌਤੇ ਕਰਨ ਲਈ ਆਈ ਈ ਈ ਪੀ ਏ ਟੈਰਿਫ ਦੀ ਵਰਤੋਂ ਕੀਤੀ ਹੈ।’’
