ਨਵੇਂ ਨੇਤਾ ਦੀ ਚੋਣ ਲਈ ਸਮਾਂ-ਸਾਰਣੀ ਤੈਅ ਕਰਨ ਦੀ ਮੰਗ ਦਾ ਸਮਰਥਨ
ਨਵੀਂ ਦਿੱਲੀ, 11 ਮਈ,ਬੋਲੇ ਪੰਜਾਬ ਬਿਊਰੋ (ਮਨਪ੍ਰੀਤ ਸਿੰਘ ਖਾਲਸਾ):-
ਪਿਛਲੇ ਹਫ਼ਤੇ ਸਥਾਨਕ ਚੋਣਾਂ ਤੋਂ ਪਹਿਲਾਂ ਅਸੀਂ ਲੰਮਾ ਵਿਚਾਰ ਕੀਤਾ ਕਿ ਲੇਬਰ ਪਾਰਟੀ ਦੇ ਸੰਸਦ ਮੈਂਬਰਾਂ ਨੂੰ ਲਿਖਿਆ ਜਾਵੇ ਅਤੇ ਉਨ੍ਹਾਂ ਨੂੰ ਕਿਹਾ ਜਾਵੇ ਕਿ ਉਹ ਆਪਣੇ ਕੀਤੇ ਵਾਅਦੇ ਪੂਰੇ ਕਰਨ ਲਈ ਜਾਂ ਤਾਂ ਆਪਣੀ ਦਿਸ਼ਾ ਬਦਲਣ ਜਾਂ ਨੇਤ੍ਰਿਤਵ ਵਿੱਚ ਤਬਦੀਲੀ ਲਿਆਉਣ। ਸਿੱਖ ਫੈਡਰੇਸ਼ਨ ਯੂਕੇ ਵਲੋਂ ਜਾਰੀ ਕੀਤੇ ਪ੍ਰੈਸ ਨੋਟ ਵਿਚ ਉਨ੍ਹਾਂ ਲਿਖਿਆ ਕਿ ਲੇਬਰ ਪਾਰਟੀ ਲਈ ਨਤੀਜੇ ਹੋਰ ਵੀ ਮਾੜੇ ਹੋ ਸਕਦੇ ਸਨ ਜੇ ਸਿੱਖ ਭਾਈਚਾਰੇ ਨੇ ਰੈਡਬ੍ਰਿਜ, ਈਲਿੰਗ ਅਤੇ ਵੂਲਵਰਹੈਂਪਟਨ ਵਰਗੀਆਂ ਥਾਵਾਂ ‘ਤੇ ਮਨ ਮਾਰ ਕੇ ਲੇਬਰ ਦਾ ਸਮਰਥਨ ਨਾ ਕੀਤਾ ਹੁੰਦਾ। ਸੈਂਡਵੈੱਲ, ਸਲਾਓ, ਹਾਉਨਸਲੋ, ਕੋਵੈਂਟਰੀ ਅਤੇ ਵਾਲਸਾਲ ਵਰਗੀਆਂ ਥਾਵਾਂ ਤੋਂ ਸਾਨੂੰ ਸਿੱਖ ਭਾਈਚਾਰੇ ਵੱਲੋਂ ਇਹ ਪ੍ਰਤੀਕਿਰਿਆ ਮਿਲੀ ਹੈ ਕਿ ਹਾਲਾਤ ਖਰਾਬ ਹੋਣੇ ਸ਼ੁਰੂ ਹੋ ਚੁੱਕੇ ਹਨ। ਖੁਸ਼ਕਿਸਮਤੀ ਨਾਲ ਡਰਬੀ, ਲੈਸਟਰ ਅਤੇ ਗਰੇਵਜ਼ਹੈਮ ਵਰਗੀਆਂ ਥਾਵਾਂ ‘ਤੇ ਕੋਈ ਚੋਣ ਨਹੀਂ ਹੋਈ। ਉਨ੍ਹਾਂ ਕਿਹਾ ਤਿੰਨ ਮਹੀਨੇ ਪਹਿਲਾਂ ਅਸੀਂ ਕੀਰ ਸਟਾਰਮਰ ਨੂੰ ਲੇਬਰ ਨੇਤ੍ਰਿਤਵ ਵੱਲੋਂ ਸਿੱਖ ਭਾਈਚਾਰੇ ਨਾਲ ਕੀਤੇ ਗਏ ਖਾਸ ਵਾਅਦਿਆਂ ‘ਤੇ ਤਰੱਕੀ ਦੀ ਘਾਟ ਬਾਰੇ ਲਿਖਿਆ ਸੀ। ਮਾਰਚ ਵਿੱਚ ਸਾਨੂੰ ਜੋ ਜਵਾਬ ਮਿਲਿਆ, ਉਹ ਸਰਕਾਰ ਅਤੇ ਸਿੱਖ ਭਾਈਚਾਰੇ ਵਿਚਕਾਰ ਸੰਪਰਕ ਸੁਧਾਰਨ ਬਾਰੇ ਸੀ, ਪਰ ਉਹ ਕੇਵਲ ਇੱਕ ਆਮ ਜਵਾਬ ਹੀ ਸੀ। ਉਨ੍ਹਾਂ ਲਿਖਿਆ ਕਿ ਅਸੀਂ ਦੁਬਾਰਾ ਲਿਖਿਆ ਹੈ ਅਤੇ ਹੁਣ ਵੀ ਉਨ੍ਹਾਂ ਕਾਰਵਾਈਆਂ ਦੀ ਉਡੀਕ ਕਰ ਰਹੇ ਹਾਂ ਜੋ ਲੇਬਰ ਨੇਤ੍ਰਿਤਵ ਵੱਲੋਂ ਕੀਤੇ ਵਾਅਦਿਆਂ ਨੂੰ ਪੂਰਾ ਕਰਨ ਲਈ ਲਾਜ਼ਮੀ ਹਨ। ਨਹੀਂ ਤਾਂ ਸਾਨੂੰ ਡਰ ਹੈ ਕਿ ਲੇਬਰ ਪਾਰਟੀ ਇੱਕ ਪੀੜ੍ਹੀ ਲਈ 10 ਲੱਖ ਸਿੱਖ ਵੋਟਾਂ ਗਵਾ ਸਕਦੀ ਹੈ। ਹੁਣ ਅਸੀਂ ਇਸ ਨਤੀਜੇ ‘ਤੇ ਪਹੁੰਚੇ ਹਾਂ ਕਿ ਲੇਬਰ ਪਾਰਟੀ ਨੂੰ ਨਵੇਂ ਨੇਤ੍ਰਿਤਵ ਦੀ ਲੋੜ ਹੈ ਅਤੇ ਅਸੀਂ ਸਾਰੇ ਲੇਬਰ ਸੰਸਦ ਮੈਂਬਰਾਂ ਨੂੰ ਲਿਖ ਰਹੇ ਹਾਂ ਕਿ ਉਹ ਨਵੇਂ ਨੇਤਾ ਦੀ ਚੋਣ ਲਈ ਸਮਾਂ-ਸਾਰਣੀ ਤੈਅ ਕਰਨ ਦੀ ਮੰਗ ਦਾ ਸਮਰਥਨ ਕਰਨ।
ਕੇਵਲ ਨਵਾਂ ਨੇਤਾ ਅਤੇ ਨਵੇਂ ਵਿਚਾਰ ਹੀ ਉਹ ਵੋਟਰ ਮੁੜ ਜਿੱਤ ਸਕਦੇ ਹਨ ਜੋ ਨਿਰਾਸ਼ ਹੋ ਕੇ ਲੇਬਰ ਤੋਂ ਦੂਰ ਹੋ ਚੁੱਕੇ ਹਨ। ਨੈਸ਼ਨਲ ਏਗਜ਼ਿਕਿਊਟਿਵ ਕੌਂਸਲ ਨੂੰ ਐਂਡੀ ਬਰਨਹਮ ਨੂੰ ਚੋਣ ਲੜਨ ਅਤੇ ਸੰਸਦ ਮੈਂਬਰ ਬਣਨ ਤੋਂ ਨਹੀਂ ਰੋਕਣਾ ਚਾਹੀਦਾ। ਜੇ ਉਹ ਸੰਸਦ ਮੈਂਬਰ ਬਣਦੇ ਹਨ ਤਾਂ ਉਹ ਨੇਤਾ ਬਣਨ ਲਈ ਸਭ ਤੋਂ ਮਜ਼ਬੂਤ ਦਾਵੇਦਾਰ ਹੋਣਗੇ। ਸਮਾਂ- ਸਾਰਣੀ ਇਸ ਤਰ੍ਹਾਂ ਹੋਣੀ ਚਾਹੀਦੀ ਹੈ ਕਿ ਲੇਬਰ ਪਾਰਟੀ ਦੇ ਮੈਂਬਰਾਂ ਨੂੰ ਇਹ ਫੈਸਲਾ ਕਰਨ ਦਾ ਮੌਕਾ ਮਿਲੇ ਕਿ ਐਂਡੀ ਬਰਨਹਮ ਅਗਲਾ ਨੇਤਾ ਹੋਣਾ ਚਾਹੀਦਾ ਹੈ ਜਾਂ ਨਹੀਂ।
