ਗਲੋਬਲ ਸਪਲਾਈ ਚੇਨ ‘ਚ ਰੁਕਾਵਟ ਕਾਰਨ ਉਸਾਰੀ ਸਮੱਗਰੀ ਦੀ ਕਿੱਲਤ ਵਧੀ, ਮਹਿੰਗੀਆਂ ਦਰਾਂ ਨੇ ਪਰੇਸ਼ਾਨੀ ਵਧਾਈ
ਜੇ ਹਰਿਆਣਾ ਦੀਆਂ ਸੜਕਾਂ ਚਮਕਦੀਆਂ ਚਾਹੀਦੀਆਂ ਹਨ ਤਾਂ ਸਰਕਾਰ ਨੂੰ ਮਦਦ ਦਾ ਹੱਥ ਵਧਾਉਣਾ ਪਵੇਗਾ
ਚੰਡੀਗੜ੍ਹ, 13 ਅਕਤੂਬਰ ਬੋਲੇ ਪੰਜਾਬ ਬਿਊਰੋ( ਹਰਦੇਵ ਚੌਹਾਨ)
ਆਲ ਹਰਿਆਣਾ ਪੀਡਬਲਯੂਡੀ ਕਾਂਟਰੈਕਟਰ ਐਸੋਸੀਏਸ਼ਨ ਦੀ ਅੱਜ ਨਿਰਮਾਣ ਸਦਨ ਵਿੱਚ ਹੋਈ ਮੀਟਿੰਗ ਵਿੱਚ ਸੜਕ ਨਿਰਮਾਣ ਦੇ ਲੰਬਿਤ ਕੰਮਾਂ ਨੂੰ ਪੂਰਾ ਕਰਨ ਲਈ ਸਰਕਾਰ ਤੋਂ 31 ਮਾਰਚ ਤੱਕ ਐਕਸਟੈਂਸ਼ਨ ਦੇਣ ਦੀ ਮੰਗ ਕੀਤੀ ਗਈ। ਐਸੋਸੀਏਸ਼ਨ ਦੇ ਚੇਅਰਮੈਨ ਅਸ਼ੋਕ ਜੈਨ ਨੇ ਕਿਹਾ ਕਿ ਸਰਕਾਰ ਠੇਕੇਦਾਰਾਂ ਨੂੰ ਪਹਿਲਾਂ 30 ਜੂਨ ਤੱਕ ਅਤੇ ਫਿਰ 30 ਸਤੰਬਰ ਤੱਕ ਅੱਗੇ ਵੀ ਐਕਸਟੈਂਸ਼ਨ ਦੇ ਚੁੱਕੀ ਹੈ, ਪਰ ਇਸ ਦੇ ਬਾਵਜੂਦ ਵੱਡੀ ਗਿਣਤੀ ਵਿੱਚ ਠੇਕੇਦਾਰਾਂ ਦੇ ਕੰਮ ਹਾਲੇ ਤੱਕ ਅਧੂਰੇ ਪਏ ਹਨ, ਜਿਨ੍ਹਾਂ ਦੀ ਕੀਮਤ 1500 ਕਰੋੜ ਅੰਕੀ ਗਈ ਹੈ।
ਚੇਅਰਮੈਨ ਅਸ਼ੋਕ ਜੈਨ, ਪ੍ਰਧਾਨ ਜੈ ਭਗਵਾਨ ਅਤੇ ਉਪ ਪ੍ਰਧਾਨ ਮਨੋਜ ਚਹਲ ਨੇ ਕਿਹਾ ਕਿ ਗਲੋਬਲ ਸਪਲਾਈ ਚੇਨ ਵਿੱਚ ਰੁਕਾਵਟ ਆਉਣ ਕਾਰਨ ਨਿਰਮਾਣ ਸਮੱਗਰੀ ਦੀ ਉਪਲਬਧਤਾ ਪ੍ਰਭਾਵਿਤ ਹੋਈ ਸੀ, ਜਿਸ ਨਾਲ ਸੜਕ ਨਿਰਮਾਣ ਕੰਮਾਂ ਵਿੱਚ ਦੇਰੀ ਸ਼ੁਰੂ ਹੋਈ। ਹਾਲੇ ਵੀ ਜ਼ਰੂਰੀ ਸਮੱਗਰੀ ਦੀ ਉਪਲਬਧਤਾ ਘੱਟ ਹੈ ਅਤੇ ਉਸਦੀ ਕੀਮਤ ਪਹਿਲਾਂ ਦੇ ਮੁਕਾਬਲੇ ਕਾਫ਼ੀ ਵੱਧ ਗਈ ਹੈ। ਅਜਿਹੇ ਵਿੱਚ ਠੇਕੇਦਾਰਾਂ ਲਈ ਨਿਰਧਾਰਤ ਸਮੇਂ ਵਿੱਚ ਕੰਮ ਪੂਰਾ ਕਰਨਾ ਮੁਸ਼ਕਲ ਹੋ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਜੇ ਸਰਕਾਰ ਇੱਕਮੁਸ਼ਤ 31 ਮਾਰਚ 2027 ਤੱਕ ਐਕਸਟੈਂਸ਼ਨ ਨਹੀਂ ਦਿੰਦੀ, ਤਾਂ ਠੇਕੇਦਾਰਾਂ ਨੂੰ ਭਾਰੀ ਆਰਥਿਕ ਨੁਕਸਾਨ ਝੱਲਣਾ ਪੈ ਸਕਦਾ ਹੈ। ਉਨ੍ਹਾਂ ਅਨੁਸਾਰ, ਠੇਕੇਦਾਰਾਂ ਦੀ ਪੂੰਜੀ ਫਸਣ ਅਤੇ ਨੁਕਸਾਨ ਵਧਣ ਨਾਲ ਉਨ੍ਹਾਂ ਸਾਹਮਣੇ ਗੰਭੀਰ ਆਰਥਿਕ ਸੰਕਟ ਖੜ੍ਹਾ ਹੋ ਸਕਦਾ ਹੈ। ਐਸੋਸੀਏਸ਼ਨ ਨੇ ਸਰਕਾਰ ਤੋਂ ਮੰਗ ਕੀਤੀ ਕਿ ਮੌਜੂਦਾ ਹਾਲਾਤਾਂ ਨੂੰ ਦੇਖਦੇ ਹੋਏ ਠੇਕੇਦਾਰਾਂ ਨੂੰ ਰਾਹਤ ਦਿੱਤੀ ਜਾਵੇ, ਤਾਂ ਜੋ ਲੰਬਿਤ ਸੜਕ ਨਿਰਮਾਣ ਕੰਮ ਪੂਰੇ ਕੀਤੇ ਜਾ ਸਕਣ। ਸੰਸਥਾ ਨੇ ਬਿਟੂਮੀਨ ਦੀ ਇੰਪੋਰਟ ਦੀ ਤਾਰੀਖ ਵੀ ਅੱਗੇ ਵਧਾਉਣ ਦੀ ਮੰਗ ਕੀਤੀ ਹੈ ਜਾਂ ਫਿਰ ਉਨ੍ਹਾਂ ਨੇ ਸਰਕਾਰ ਨੂੰ ਬਿਟੂਮੀਨ ਦਾ ਪ੍ਰਬੰਧ ਖੁਦ ਕਰਨਾ ਚਾਹੀਦਾ ਹੈ।
