ਨਵੀਂ ਦਿੱਲੀ 14 ਅਕਤੂਬਰ ,ਬੋਲੇ ਪੰਜਾਬ ਬਿਉਰੋ;
ਐਨਫੋਰਸਮੈਂਟ ਡਾਇਰੈਕਟੋਰੇਟ (ED) ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਉਸ ਨੇ ਫੌਰਨ ਐਕਸਚੇਂਜ ਮੈਨੇਜਮੈਂਟ ਐਕਟ (FEMA) ਤਹਿਤ ਚੱਲ ਰਹੀ ਜਾਂਚ ਦੇ ਸਬੰਧ ਵਿੱਚ ਰਿਲਾਇੰਸ ਪਾਵਰ ਲਿਮਟਿਡ (RPL) ਨਾਲ ਸਬੰਧਤ ਭਾਰਤ ਵਿੱਚ 2,032.81 ਕਰੋੜ ਰੁਪਏ ਦੀਆਂ ਜਾਇਦਾਦਾਂ ਜ਼ਬਤ ਕੀਤੀਆਂ ਹਨ। ਇਹ ਜਾਇਦਾਦਾਂ ਫੌਰਨ ਐਕਸਚੇਂਜ ਮੈਨੇਜਮੈਂਟ ਐਕਟ (FEMA), 1999 ਦੀ ਧਾਰਾ 37A ਤਹਿਤ ਜ਼ਬਤ ਕੀਤੀਆਂ ਗਈਆਂ ਹਨ। ਈ.ਡੀ. ਨੇ ਕਿਹਾ ਕਿ ਜ਼ਬਤ ਕੀਤੀਆਂ ਗਈਆਂ ਜਾਇਦਾਦਾਂ ਵਿੱਚ ਆਰ.ਪੀ.ਐੱਲ. ਦੇ ਬੈਂਕ ਬੈਲੇਂਸ ਅਤੇ ਸਾਸਾਨ ਪਾਵਰ ਲਿਮਟਿਡ ਵਿੱਚ ਇਸ ਦੀ ਸ਼ੇਅਰਹੋਲਡਿੰਗ ਸ਼ਾਮਲ ਹੈ, ਅਤੇ ਇਹ ਜਾਇਦਾਦਾਂ ਫੇਮਾ ਦੀ ਧਾਰਾ 4 ਦੀ ਉਲੰਘਣਾ ਕਰਕੇ ਭਾਰਤ ਤੋਂ ਬਾਹਰ ਰੱਖੀ ਗਈ ਵਿਦੇਸ਼ੀ ਮੁਦਰਾ ਦੇ ਬਰਾਬਰ ਕੀਮਤ ਦੀਆਂ ਹਨ।
ਕੇਂਦਰੀ ਏਜੰਸੀ ਨੇ ਕਿਹਾ ਕਿ ਉਸ ਦੀ ਜਾਂਚ SEBI ਤੋਂ ਪ੍ਰਾਪਤ ਜਾਣਕਾਰੀ ਦੇ ਆਧਾਰ ‘ਤੇ ਸ਼ੁਰੂ ਕੀਤੀ ਗਈ ਸੀ, ਜੋ ਆਰ.ਪੀ.ਐੱਲ. ਵੱਲੋਂ ਆਪਣੇ ਖਾਤਿਆਂ ਦੀਆਂ ਕਿਤਾਬਾਂ ਵਿੱਚ ਕੀਤੀ ਗਈ ਕੁੱਲ 2,101.46 ਕਰੋੜ ਰੁਪਏ ਦੀ ਰਾਈਟ-ਆਫ (ਰੱਦ) ਅਤੇ ਪ੍ਰੋਵਿਜ਼ਨਿੰਗ ਨਾਲ ਸਬੰਧਤ ਸੀ। ਈ.ਡੀ. ਨੇ ਇੱਕ ਬਿਆਨ ਵਿੱਚ ਕਿਹਾ, “ਇਹ ਰਾਈਟ-ਆਫ ਬ੍ਰਿਟਿਸ਼ ਵਰਜਿਨ ਆਈਲੈਂਡਜ਼ (BVI) ਅਤੇ ਕੇਮੈਨ ਆਈਲੈਂਡਜ਼ ਵਿੱਚ ਕੰਪਨੀਆਂ ਨੂੰ ਕੀਤੇ ਗਏ ਵਿਦੇਸ਼ੀ ਨਿਵੇਸ਼ਾਂ ਅਤੇ ਐਡਵਾਂਸ ਨਾਲ ਸਬੰਧਤ ਸਨ।”ਕੇਂਦਰੀ ਏਜੰਸੀ ਨੇ ਇਸੇ ਸਾਲ 6 ਮਾਰਚ ਤੋਂ 8 ਮਾਰਚ ਤੱਕ ਫੇਮਾ ਤਹਿਤ ਤਲਾਸ਼ੀ ਅਭਿਆਨ ਵੀ ਚਲਾਇਆ ਸੀ, ਜਿਸ ਦੌਰਾਨ ਕਈ ਇਤਰਾਜ਼ਯੋਗ ਸਬੂਤ ਜ਼ਬਤ ਕੀਤੇ ਗਏ ਸਨ ਅਤੇ ਕਈ ਵਿਅਕਤੀਆਂ ਦੇ ਬਿਆਨ ਦਰਜ ਕੀਤੇ ਗਏ ਸਨ।ਈ.ਡੀ. ਨੇ ਦੱਸਿਆ, “ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਰਿਲਾਇੰਸ ਨੈਚੁਰਲ ਰਿਸੋਰਸਿਜ਼ ਲਿਮਟਿਡ (ਜੋ ਬਾਅਦ ਵਿੱਚ ਆਰ.ਪੀ.ਐੱਲ. ਵਿੱਚ ਮਿਲ ਗਈ ਸੀ) ਨੇ 275 ਮਿਲੀਅਨ ਅਮਰੀਕੀ ਡਾਲਰ ਜੁਟਾਏ ਸਨ, ਜੋ ਉਸ ਦੀ ਪੂਰੀ ਮਲਕੀਅਤ ਵਾਲੀ ਸਿੰਗਾਪੁਰ ਦੀ ਸਹਾਇਕ ਕੰਪਨੀ ‘ਰਿਲਾਇੰਸ ਨੈਚੁਰਲ ਰਿਸੋਰਸਿਜ਼ (ਸਿੰਗਾਪੁਰ) ਪੀ.ਟੀ.ਈ. ਲਿਮਟਿਡ’ (RNRL-S) ਵਿੱਚ ਨਿਵੇਸ਼ ਕੀਤੇ ਗਏ ਸਨ।”
