ਅਹਿਮਦਾਬਾਦ, 27 ਅਕਤੂਬਰ, ਬੋਲੇ ਪੰਜਾਬ ਬਿਊਰੋ :
ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਨੂੰ ਅਹਿਮਦਾਬਾਦ ਦੀ ਸਾਬਰਮਤੀ ਕੇਂਦਰੀ ਜੇਲ੍ਹ ਵਿੱਚ ਸਥਿਤ ਉੱਚ-ਸੁਰੱਖਿਆ ਵਾਲੇ ‘200 ਖੋਲੀ’ (200-ਸੈੱਲ) ਬਲਾਕ ਵਿੱਚ ਤਬਦੀਲ ਕੀਤਾ ਗਿਆ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ, ਇਸ ਬਲਾਕ ਵਿੱਚ ਗੰਭੀਰ ਅਪਰਾਧਾਂ ਦੇ ਦੋਸ਼ੀ ਵਿਅਕਤੀ ਰੱਖੇ ਜਾਂਦੇ ਹਨ, ਜਿਨ੍ਹਾਂ ਵਿੱਚ 2008 ਦੇ ਲੜੀਵਾਰ ਧਮਾਕਿਆਂ ਵਿੱਚ ਸ਼ਾਮਲ ਅੱਤਵਾਦੀ ਵੀ ਸ਼ਾਮਲ ਹਨ।
ਲਾਰੈਂਸ ਨੂੰ ਵੱਖਰਾ ਰੱਖਣ ਅਤੇ ਕੈਦੀਆਂ ਦੀਆਂ ਕੋਠੜੀਆਂ ਵਿਚਕਾਰ ਆਵਾਜਾਈ ਨੂੰ ਰੋਕਣ ਲਈ, ਇਸ ਬਲਾਕ ਨੂੰ ਚਾਰ ਹਿੱਸਿਆਂ ਵਿੱਚ ਵੰਡਿਆ ਗਿਆ ਹੈ। ਹਰੇਕ ਹਿੱਸੇ ਵਿੱਚ 50 ਕੈਦੀ ਰੱਖੇ ਜਾ ਸਕਦੇ ਹਨ। ਲਾਰੈਂਸ ਦੀ ਕੋਠੜੀ ਦਾ ਆਕਾਰ ਲਗਭਗ 7.5 ਗੁਣਾ 11 ਫੁੱਟ ਹੈ। ਉਹ 10 ਮਈ, 2023 ਤੋਂ ਇਸ ਜੇਲ੍ਹ ਵਿੱਚ ਬੰਦ ਹੈ।
ਇਹ ਕਦਮ ਲਾਰੈਂਸ ਦੇ ਨੈੱਟਵਰਕ ਨੂੰ ਨੱਥ ਪਾਉਣ ਲਈ ਚੁੱਕਿਆ ਗਿਆ ਹੈ। ਜਾਂਚਕਰਤਾਵਾਂ ਅਨੁਸਾਰ, ਪਿਛਲੇ ਦੋ ਸਾਲਾਂ ਦੌਰਾਨ ਲਾਰੈਂਸ ਦੇ ਕਿਸੇ ਨਾਲ ਵੀ ਸਿੱਧੇ ਸੰਪਰਕ ਦਾ ਕੋਈ ਸਬੂਤ ਨਹੀਂ ਮਿਲਿਆ ਹੈ; ਹਾਲਾਂਕਿ, ਸਾਬਰਮਤੀ ਜੇਲ੍ਹ ਵਿੱਚ ਕੈਦ ਹੋਣ ਦੇ ਬਾਵਜੂਦ, ਉਸਦਾ ਗੈਂਗ ਵਿਦੇਸ਼ ਤੋਂ ਆਪਣਾ ਕੰਮਕਾਜ ਚਲਾ ਰਿਹਾ ਹੈ।
