ਨਵੀਂ ਦਿੱਲੀ, 29 ਨਵੰਬਰ,ਬੋਲੇ ਪੰਜਾਬ ਬਿਊਰੋ;
ਹਵਾਈ ਯਾਤਰਾ ਕਰਨ ਵਾਲਿਆਂ ਲਈ ਮਹੱਤਵਪੂਰਨ ਖ਼ਬਰ ਆਈ ਹੈ। ਏਅਰਬੱਸ ਵੱਲੋਂ ਸੰਸਾਰ ਭਰ ਵਿੱਚ ਉਡਦੇ A320 ਜਹਾਜ਼ਾਂ ਲਈ ਨਵੀਂ ਟੈਕਨਿਕਲ ਐਡਵਾਇਜ਼ਰੀ ਜਾਰੀ ਕੀਤੀ ਗਈ ਹੈ, ਜਿਸ ਦਾ ਸਿੱਧਾ ਅਸਰ ਭਾਰਤ ਦੀਆਂ ਦੋਵਾਂ ਵੱਡੀਆਂ ਏਅਰਲਾਈਨਾਂ – ਏਅਰ ਇੰਡੀਆ ਅਤੇ ਇੰਡੀਗੋ – ’ਤੇ ਪੈਣ ਦੀ ਸੰਭਾਵਨਾ ਹੈ। ਦੋਵਾਂ ਕੰਪਨੀਆਂ ਦੇ ਬੇੜੇ ਵਿੱਚ A320 ਜਹਾਜ਼ ਵੱਧ ਗਿਣਤੀ ਵਿੱਚ ਸ਼ਾਮਲ ਹਨ, ਇਸ ਲਈ ਘਰੇਲੂ ਉਡਾਣਾਂ ਵਿਚ ਦੇਰੀ ਜਾਂ ਸ਼ਡਿਊਲ ਬਦਲਾਅ ਹੋ ਸਕਦੇ ਹਨ।
ਏਅਰ ਇੰਡੀਆ ਅਤੇ ਇੰਡੀਗੋ ਨੇ ਯਾਤਰੀਆਂ ਲਈ ਪਹਿਲਾਂ ਹੀ ਐਡਵਾਇਜ਼ਰੀ ਜਾਰੀ ਕਰ ਦਿੱਤੀ ਹੈ, ਜਿਸ ਵਿੱਚ ਜਾਣਕਾਰੀ ਦਿੱਤੀ ਗਈ ਹੈ ਕਿ ਤਕਨੀਕੀ ਅਪਡੇਟ ਕਰਕੇ ਉਡਾਣਾਂ ਦੇ ਸ਼ਡਿਊਲ ’ਤੇ ਅਸਰ ਪੈ ਸਕਦਾ ਹੈ। ਦੂਜੇ ਪਾਸੇ, ਜਾਪਾਨ ਦੀ ANA ਏਅਰਲਾਈਨਜ਼ ਨੇ ਹਾਲਾਤ ਨੂੰ ਵੇਖਦਿਆਂ ਆਪਣੀਆਂ 65 ਫਲਾਈਟਾਂ ਰੱਦ ਕਰਨ ਦਾ ਫ਼ੈਸਲਾ ਕੀਤਾ ਹੈ।
ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ ਤੇ ਜਾਰੀ ਕੀਤੇ ਬਿਆਨ ਵਿੱਚ ਏਅਰ ਇੰਡੀਆ ਨੇ ਲਿਖਿਆ—
“ਏਅਰਬੱਸ ਵੱਲੋਂ ਜਾਰੀ ਨਿਰਦੇਸ਼ਾਂ ਦੇ ਅਧਾਰ ’ਤੇ A320 ਬੇੜੇ ਵਿੱਚ ਕੁਝ ਸਾਫਟਵੇਅਰ ਅਤੇ ਹਾਰਡਵੇਅਰ ਅਪਡੇਟ ਲਾਜ਼ਮੀ ਹਨ। ਇਸ ਕਾਰਨ ਯਾਤਰਾ ਸਮੇਂ ਵਿੱਚ ਵਾਧਾ ਹੋ ਸਕਦਾ ਹੈ ਅਤੇ ਕੁਝ ਉਡਾਣਾਂ ਦੇ ਸ਼ਡਿਊਲ ਪ੍ਰਭਾਵਿਤ ਹੋ ਸਕਦੇ ਹਨ।”
ਹਵਾਈ ਯਾਤਰੀਆਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਡਾਣ ਤੋਂ ਪਹਿਲਾਂ ਤਾਜ਼ਾ ਅਪਡੇਟ ਜਾਂਚ ਲੈਣ ਅਤੇ ਯਾਤਰਾ ਲਈ ਕੁਝ ਵਾਧੂ ਸਮਾਂ ਰੱਖਣ।
