ਕਿਹਾ, ਜਾਸੂਸੀ ਕਰਨ ਨਹੀਂ, ਅਸ਼ਲੀਲ ਫੋਟੋਆਂ ਡਲ਼ੀਟ ਕਰਨ ਪਾਕਿਸਤਾਨ ਗਈ
ਮੁਸਲਿਮ ਵਿਅਕਤੀ ਦੀ ਮਾਂ, ਪਤਨੀ ਤੇ ਭੈਣ ਵਲੋਂ ਥੱਪੜ ਮਾਰਨ ਦੀ ਗੱਲ ਕਹੀ
ਅੰਮ੍ਰਿਤਸਰ, 15 ਜਨਵਰੀ, ਬੋਲੇ ਪੰਜਾਬ ਬਿਊਰੋ :
ਪੰਜਾਬੀ ਔਰਤ ਸਰਬਜੀਤ ਕੌਰ ਜੋ ਕਿ ਇੱਕ ਮੁਸਲਿਮ ਆਦਮੀ ਨਾਲ ਵਿਆਹ ਕਰਨ ਲਈ ਭਾਰਤ ਤੋਂ ਪਾਕਿਸਤਾਨ ਗਈ ਸੀ,ਦੀ ਉਸਦੇ ਪਤੀ ਨਾਲ ਆਡੀਓ ਰਿਕਾਰਡਿੰਗ ਵਾਇਰਲ ਹੋ ਗਈ ਹੈ। ਇੱਕ ਰਿਕਾਰਡਿੰਗ ਵਿੱਚ, ਉਸਨੇ ਆਪਣੇ ਪਤੀ ਨੂੰ ਦੱਸਿਆ ਕਿ ਉਹ ਜਾਸੂਸੀ ਕਰਨ ਲਈ ਨਹੀਂ, ਸਗੋਂ ਅਸ਼ਲੀਲ ਫੋਟੋਆਂ ਮਿਟਾਉਣ ਲਈ ਪਾਕਿਸਤਾਨ ਗਈ ਸੀ। ਉਹ ਹੁਣ ਵਾਪਸ ਆਉਣਾ ਚਾਹੁੰਦੀ ਹੈ।
ਕਪੂਰਥਲਾ ਦੀ ਰਹਿਣ ਵਾਲੀ ਸਰਬਜੀਤ ਨੇ ਰੋਂਦੇ ਦੱਸਿਆ ਕਿ ਜਿਸ ਮੁਸਲਿਮ ਆਦਮੀ ਨਾਲ ਉਸਨੇ ਵਿਆਹ ਕੀਤਾ ਸੀ, ਉਸਦੀ ਮਾਂ, ਪਤਨੀ ਅਤੇ ਭੈਣ ਨੇ ਉਸਨੂੰ ਥੱਪੜ ਮਾਰੇ। ਉਸਨੇ ਇਹ ਵੀ ਕਿਹਾ ਕਿ ਉਸਦੀ ਵਾਪਸੀ ‘ਤੇ ਕੋਈ ਉਸਨੂੰ ਪਰੇਸ਼ਾਨ ਨਾ ਕਰੇ।
ਸਰਬਜੀਤ ਨੇ ਕਿਹਾ, “ਮੈਨੂੰ ਇੱਥੇ ਪਰੇਸ਼ਾਨ ਕੀਤਾ ਜਾ ਰਿਹਾ ਹੈ। ਮੈਂ ਆਪਣੇ ਬੱਚਿਆਂ ਤੋਂ ਬਿਨਾਂ ਨਹੀਂ ਰਹਿ ਸਕਦੀ। ਮੈਂ ਲੋਕਾਂ ਨੂੰ ਕਰੋੜਾਂ ਰੁਪਏ ਦਿੰਦੀ ਸੀ। ਮੈਂ ਸਰਦਾਰਨੀ ਹਾਂ, ਪਰ ਏਥੇ ਪੈਸੇ-ਪੈਸੇ ਲਈ ਤਰਸ ਰਹੀ ਹਾਂ।”
ਜਿਕਰਯੋਗ ਹੈ ਕਿ ਸਰਬਜੀਤ ਕੌਰ ਗੁਰੂ ਨਾਨਕ ਦੇਵ ਜੀ ਦੇ ਗੁਰਪੁਰਬ ਮੌਕੇ ‘ਤੇ ਸਿੱਖ ਜਥੇ ਨਾਲ ਪਾਕਿਸਤਾਨ ਗਈ ਸੀ। ਉੱਥੇ ਉਸਨੇ ਇਸਲਾਮ ਧਰਮ ਧਾਰਨ ਕੀਤਾ, ਆਪਣਾ ਨਾਮ ਨੂਰ ਫਾਤਿਮਾ ਰੱਖ ਲਿਆ ਅਤੇ ਨਾਸਿਰ ਹੁਸੈਨ ਨਾਮ ਦੇ ਇੱਕ ਪਾਕਿਸਤਾਨੀ ਵਿਅਕਤੀ ਨਾਲ ਨਿਕਾਹ ਕਰ ਲਿਆ ਸੀ।
