ਚੰਡੀਗੜ੍ਹ 26 ਜੁਲਾਈ ,ਬੋਲੇ ਪੰਜਾਬ ਬਿਊਰੋ;
ਭਾਰਤ ਮੌਸਮ ਵਿਭਾਗ (ਆਈ ਐੱਮ ਡੀ) ਵੱਲੋਂ 25 ਜੁਲਾਈ ਨੂੰ ਜਾਰੀ ਕੀਤੇ ਗਏ ਬੁਲੇਟਿਨ ਅਨੁਸਾਰ, 26 ਅਤੇ 27 ਜੁਲਾਈ ਨੂੰ ਕੁਝ ਥਾਵਾਂ ‘ਤੇ ਅਤੇ 28 ਤੋਂ 31 ਜੁਲਾਈ ਤੱਕ ਕਈ ਥਾਵਾਂ ‘ਤੇ ਹਲਕੇ ਤੋਂ ਦਰਮਿਆਨਾ ਮੀਂਹ ਪੈਣ ਦੀ ਪੇਸ਼ੀਨਗੋਈ ਕੀਤੀ ਗਈ ਹੈ।27, 30 ਅਤੇ 31 ਜੁਲਾਈ ਨੂੰ ਕੁਝ ਥਾਵਾਂ ‘ਤੇ ਭਾਰੀ ਮੀਂਹ ਪੈਣ ਦੀ ਸੰਭਾਵਨਾ ਜਤਾਈ ਗਈ ਹੈ, ਜਿਸ ਲਈ ਮੌਸਮ ਵਿਭਾਗ ਨੇ ਯੈਲੋ ਅਲਰਟ ਜਾਰੀ ਕੀਤਾ ਹੈ। ਉੱਥੇ ਹੀ 28 ਤੋਂ 29 ਜੁਲਾਈ ਲਈ ਓਰੇਂਜ ਅਲਰਟ ਜਾਰੀ ਕੀਤਾ ਗਿਆ ਹੈ। ਸੂਬੇ ਦੇ ਉੱਤਰੀ ਅਤੇ ਪੂਰਬੀ ਖੇਤਰਾਂ ਵਿੱਚ ਦੱਖਣੀ-ਪੱਛਮੀ ਹਿੱਸਿਆਂ ਨਾਲੋਂ ਵੱਧ ਮੀਂਹ ਪੈਣ ਦੀ ਉਮੀਦ ਹੈ।ਪੰਜਾਬ ਵਿੱਚ ਮੌਨਸੂਨ ਦੀ ਮੌਜੂਦਾ ਸਥਿਤੀ ਨੂੰ “ਸਧਾਰਨ” ਕਰਾਰ ਦਿੰਦਿਆਂ, ਆਈ ਐੱਮ ਡੀ ਨੇ ਕਿਹਾ ਕਿ ਪਿਛਲੇ 24 ਘੰਟਿਆਂ ਦੌਰਾਨ ਸੂਬੇ ਵਿੱਚ ਕਈ ਥਾਵਾਂ ‘ਤੇ ਹਲਕਾ ਤੋਂ ਦਰਮਿਆਨਾ ਮੀਂਹ ਪਿਆ ਅਤੇ ਵੱਖ-ਵੱਖ ਥਾਵਾਂ ‘ਤੇ ਤੂਫ਼ਾਨ ਤੇ ਤੇਜ਼ ਹਵਾਵਾਂ ਦੇਖਣ ਨੂੰ ਮਿਲੀਆਂ।
ਕਪੂਰਥਲਾ, ਫ਼ਰੀਦਕੋਟ, ਫ਼ਤਹਿਗੜ੍ਹ ਸਾਹਿਬ ਅਤੇ ਪਟਿਆਲਾ ਇਸ ਮਿਆਦ ਦੌਰਾਨ ਖੁਸ਼ਕ ਰਹਿਣ ਵਾਲੇ ਜ਼ਿਲ੍ਹੇ ਸਨ ਅਤੇ ਸੂਬੇ ਭਰ ਵਿੱਚ ਦਿਨ ਤੇ ਰਾਤ ਦਾ ਤਾਪਮਾਨ ਆਮ ਰਿਹਾ। ਪੰਜਾਬ ਵਿੱਚ ਹੁਣ ਤੱਕ ਮੌਨਸੂਨ 23 ਫ਼ੀਸਦੀ ਘੱਟ ਹੈ। 1 ਜੁਲਾਈ ਤੋਂ 25 ਜੁਲਾਈ ਦੀ ਸਵੇਰ ਤੱਕ, ਸੂਬੇ ਵਿੱਚ ਇਸ ਮਿਆਦ ਲਈ 130.3 ਮਿਲੀਮੀਟਰ ਦੀ ਲੰਮੇ ਸਮੇਂ ਦੀ ਔਸਤ ਦੇ ਮੁਕਾਬਲੇ 100.9 ਮਿਲੀਮੀਟਰ ਮੀਂਹ ਪਿਆ ਹੈ।
1 ਜੁਲਾਈ ਤੋਂ 25 ਜੁਲਾਈ ਦੀ ਸਵੇਰ ਤੱਕ, ਸੂਬੇ ਵਿੱਚ 130.3 ਮਿਲੀਮੀਟਰ ਦੀ ਆਮ ਔਸਤ ਦੇ ਮੁਕਾਬਲੇ 100.9 ਮਿਲੀਮੀਟਰ ਮੀਂਹ ਦਰਜ ਕੀਤਾ ਗਿਆ ਹੈ। ਸੂਬੇ ਦੇ 17 ਜ਼ਿਲ੍ਹਿਆਂ ਵਿੱਚ ਮੌਨਸੂਨ ਆਮ ਨਾਲੋਂ ਘੱਟ ਰਿਹਾ ਹੈ, ਜਿੱਥੇ ਮੀਂਹ ਦੀ ਘਾਟ 65 ਫ਼ੀਸਦੀ ਤੱਕ ਪਹੁੰਚ ਗਈ ਹੈ। ਜਦੋਂ ਕਿ ਅੰਮ੍ਰਿਤਸਰ, ਫ਼ਰੀਦਕੋਟ, ਗੁਰਦਾਸਪੁਰ, ਮੋਗਾ ਅਤੇ ਪਠਾਨਕੋਟ ਸਿਰਫ਼ ਉਹ ਪੰਜ ਜ਼ਿਲ੍ਹੇ ਹਨ ਜਿੱਥੇ ਜੁਲਾਈ ਮਹੀਨੇ ਦਾ ਮੀਂਹ ਆਮ ਨਾਲੋਂ ਵੱਧ ਰਿਹਾ ਹੈ।
