ਨਵੀਂ ਦਿੱਲੀ 4 ਅਕਤੂਬਰ ,ਬੋਲੇ ਪੰਜਾਬ ਬਿਊਰੋ(ਮਨਪ੍ਰੀਤ ਸਿੰਘ ਖਾਲਸਾ):
ਸਿੱਖਸ ਫਾਰ ਜਸਟਿਸ ਵੱਲੋਂ ਦਾਅਵਾ ਕੀਤਾ ਗਿਆ ਹੈ ਕਿ ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਵੱਲੋਂ 2027 ਦੀਆਂ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ 3 ਅਕਤੂਬਰ ਨੂੰ ਬਰੈਂਪਟਨ ਵਿੱਚ ਕੀਤਾ ਜਾਣ ਵਾਲਾ ਫੰਡ ਇਕੱਠਾ ਕਰਨ ਦਾ ਸਮਾਗਮ ਖਾਲਿਸਤਾਨ ਰੈਫਰੈਂਡਮ ਕਾਰਕੁਨਾਂ ਦੇ ਵਿਰੋਧ ਕਾਰਨ ਰੱਦ ਹੋ ਗਿਆ। ਐੱਸ.ਐੱਫ.ਜੇ. ਨੇ ਕਿਹਾ ਕਿ ਇਸ ਸਮਾਗਮ ਦੇ ਆਯੋਜਨ ਨਾਲ ਆਮ ਆਦਮੀ ਪਾਰਟੀ ਦੇ ਬੁਲਾਰੇ ਬਲਤੇਜ ਪੰਨੂ ਸਮੇਤ ਓਨਟਾਰੀਓ ਫ੍ਰੈਂਡ ਕਲੱਬ ਬੀ.ਸੀ. ਅਤੇ ਜੱਟਮ ਪੰਜਾਬੀ ਸਭਾ ਦਾ ਨਾਮ ਜੁੜਿਆ ਹੋਇਆ ਸੀ। ਸਮਾਗਮ ਦੇ ਰੱਦ ਹੋਣ ਨਾਲ 2014 ਤੋਂ 2022 ਦਰਮਿਆਨ ‘ਆਪ’ ਵੱਲੋਂ ਕੈਨੇਡਾ-ਵੱਸਦੇ ਖਾਲਿਸਤਾਨ ਪੱਖੀ ਸਿੱਖਾਂ ਤੋਂ ਕਥਿਤ ਤੌਰ ’ਤੇ ਇਕੱਠੇ ਕੀਤੇ 16 ਮਿਲੀਅਨ ਡਾਲਰ ਦੀ ਫੰਡਿੰਗ ਦਾ ਮੁੱਦਾ ਮੁੜ ਭਖ ਗਿਆ ਹੈ। ਐੱਸਐੱਫਜੇ ਦਾ ਦਾਅਵਾ ਹੈ ਕਿ ਉਸ ਦੌਰ ਵਿੱਚ ‘ਆਪ’ ਨੇ ਵਿਦੇਸ਼ੀ ਸਮਰਥਨ ਹਾਸਲ ਕੀਤਾ ਅਤੇ ਪੰਜਾਬ ਨਾਲ ਜੁੜੇ ਕਈ ਵਾਅਦੇ ਕੀਤੇ, ਜਿਨ੍ਹਾਂ ਵਿੱਚ ਪ੍ਰੋ. ਦਵਿੰਦਰਪਾਲ ਸਿੰਘ ਭੁੱਲਰ ਦੀ ਰਿਹਾਈ ਦਾ ਮਾਮਲਾ ਵੀ ਸ਼ਾਮਲ ਸੀ। ਐੱਸ.ਐੱਫ.ਜੇ. ਦੇ ਜਨਰਲ ਕੌਂਸਲ ਗੁਰਪਤਵੰਤ ਸਿੰਘ ਪੰਨੂ ਨੇ ‘ਆਪ’ ’ਤੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਕਿ “ਜਿਨ੍ਹਾਂ ਕੈਨੇਡਾ-ਅਧਾਰਿਤ ਖਾਲਿਸਤਾਨ ਪੱਖੀ ਸਿੱਖਾਂ ਦੇ ਸਮਰਥਨ ਨਾਲ ‘ਆਪ’ ਨੇ ਸਿਆਸੀ ਤਾਕਤ ਬਣਾਈ, ਅੱਜ ਉਹੀ ਲੋਕ 2027 ਲਈ ਫੰਡ ਇਕੱਠਾ ਕਰਨ ਆਏ ਆਗੂਆਂ ਦੇ ਸਾਹਮਣੇ ਖੜ੍ਹੇ ਹਨ।” ਪੰਨੂ ਨੇ ਦਾਅਵਾ ਕੀਤਾ ਕਿ ਹੁਣ ਖਾਲਿਸਤਾਨ ਰੈਫਰੈਂਡਮ ਕਾਰਕੁਨ ਪੰਜਾਬ ਦੇ ਨਸ਼ਿਆਂ, ਕਰਜ਼ੇ, ਕਥਿਤ ਫਰਜ਼ੀ ਮੁਕਾਬਲਿਆਂ ਅਤੇ ਜਨਸੰਖਿਆਕ ਵਿਸਥਾਪਨ ਵਰਗੇ ਮੁੱਦਿਆਂ ’ਤੇ ਭਗਵੰਤ ਮਾਨ ਸਰਕਾਰ ਨੂੰ ਘੇਰ ਰਹੇ ਹਨ। ਹਾਲਾਂਕਿ, ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਪੁਸ਼ਟੀ ਨਹੀਂ ਹੋਈ।
