ਚੰਡੀਗੜ੍ਹ, 29 ਸਤੰਬਰ ,ਬੋਲੇ ਪੰਜਾਬ ਬਿਊਰੋ;
ਏਸ਼ਿਆਈ ਖੇਡਾਂ 2026 ਵਿੱਚ ਭਾਰਤ ਅਤੇ ਪਾਕਿਸਤਾਨ ਦੀਆਂ ਪੁਰਸ਼ ਹਾਕੀ ਟੀਮਾਂ 1 ਅਕਤੂਬਰ ਨੂੰ ਸੈਮੀਫਾਈਨਲ ਵਿੱਚ ਆਹਮੋ-ਸਾਹਮਣੇ ਹੋਣਗੀਆਂ। ਭਾਰਤੀ ਟੀਮ ਨੇ ਪੂਲ ਪੜਾਅ ਵਿੱਚ ਲਗਾਤਾਰ ਜਿੱਤਾਂ ਦਰਜ ਕਰਦਿਆਂ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਈ ਹੈ। ਹੁਣ ਨਾਕਆਊਟ ਮੁਕਾਬਲੇ ਵਿੱਚ ਉਸ ਦਾ ਸਾਹਮਣਾ ਪਾਕਿਸਤਾਨ ਨਾਲ ਹੋਵੇਗਾ। ਸੈਮੀਫਾਈਨਲ ਜਿੱਤਣ ਵਾਲੀ ਟੀਮ ਫਾਈਨਲ ਵਿੱਚ ਸੋਨ ਤਮਗੇ ਲਈ ਖੇਡੇਗੀ। ਹਾਕੀ ਇੰਡੀਆ ਵੱਲੋਂ ਵੀ ਇਸ ਮੁਕਾਬਲੇ ਦੀ ਪੁਸ਼ਟੀ ਕੀਤੀ ਗਈ ਹੈ।
1 ਅਕਤੂਬਰ ਨੂੰ ਪੁਰਸ਼ ਹਾਕੀ ਦੇ ਦੋਵੇਂ ਸੈਮੀਫਾਈਨਲ ਖੇਡੇ ਜਾਣੇ ਹਨ। ਸ਼ਡਿਊਲ ਵਿੱਚ ਮੁਕਾਬਲਿਆਂ ਲਈ ਭਾਰਤੀ ਸਮੇਂ ਅਨੁਸਾਰ ਦੁਪਹਿਰ 1 ਵਜੇ ਅਤੇ 3:30 ਵਜੇ ਦੇ ਸਲਾਟ ਰੱਖੇ ਗਏ ਹਨ। ਹਾਲਾਂਕਿ ਭਾਰਤ-ਪਾਕਿਸਤਾਨ ਸੈਮੀਫਾਈਨਲ ਇਨ੍ਹਾਂ ਵਿੱਚੋਂ ਕਿਸ ਸਮੇਂ ਹੋਵੇਗਾ, ਇਸ ਦੀ ਅਜੇ ਪੁਸ਼ਟੀ ਨਹੀਂ ਹੋਈ।
ਸੈਮੀਫਾਈਨਲ ਤੋਂ ਬਾਅਦ 3 ਅਕਤੂਬਰ ਨੂੰ ਪੁਰਸ਼ ਹਾਕੀ ਦੇ ਤਮਗਾ ਮੁਕਾਬਲੇ ਹੋਣਗੇ। ਸੈਮੀਫਾਈਨਲ ਜਿੱਤਣ ਵਾਲੀਆਂ ਦੋਵੇਂ ਟੀਮਾਂ ਸੋਨ ਤਮਗੇ ਲਈ ਭਿੜਨਗੀਆਂ, ਜਦਕਿ ਹਾਰਨ ਵਾਲੀਆਂ ਟੀਮਾਂ ਕਾਂਸੀ ਦੇ ਤਮਗੇ ਲਈ ਮੁਕਾਬਲਾ ਕਰਨਗੀਆਂ। ਸ਼ਡਿਊਲ ਮੁਤਾਬਕ ਕਾਂਸੀ ਤਮਗੇ ਦਾ ਮੈਚ ਦੁਪਹਿਰ 1 ਵਜੇ ਅਤੇ ਸੋਨ ਤਮਗੇ ਦਾ ਫਾਈਨਲ ਦੁਪਹਿਰ 3:30 ਵਜੇ ਖੇਡਿਆ ਜਾਵੇਗਾ।
